Gott gengi

Vagnarölt og kaffispjall með góðvinkonu.
Fórum að vísu ekki á þetta kaffihús en mér fannst litirnir svo fínir.

Elvis og félagar

Afmælisfögnuður frábærs frænda sem á sama afmælisdag og Elvis, David Bowie og nú síðast dönsku tvíbbarnir. Það skal því engan undra snilligáfu þessa unga drengs sem finnst tölur og tækni eitt það magnaðasta í heimi hér.

Boðhættir

Á 5 vikna ferli sínum í þessum heimi hefur "Lilli" farið í um 15 jólaboð og heimsóknir sem gjöra að meðaltali 3 boð á viku. Minna má það varla vera*

Lokkandi

Það dugðu ekki færri en 3 piparkökuhús til skreytinga þetta árið.
Eitt frá ömmunni, eitt skreytt hjá afanum og ömmunni og eitt samskreytiverkefni frændsystkina. Eitt bráðnaði í sundur, annað var brotið með kjethamri og rósóttum dverghamri um daginn og það síðasta stendur enn. Salka var svo sniðug að hafa eitt í herberginu sínu og tryggði þar með lokkandi jólailm og stemmningu yfir hátíðarnar í svefni sem vöku.

Jólakaffisamsæti

Ég hef vart tölu á öllum þeim jólaboðum og heimsóknum sem við spói höfum farið í yfir jólin.
Öll eiga þau það sameiginlegt að hafa verið einstaklega notaleg og kósý.
Á fjórða degi jóla var förinni heitið í Sólskinsheima þar sem góðvinir og veitingar biðu okkar.

Ofurhetjur...

Aðfangadagur var fagur og jólin voru hvít.
Rólegar myndir af aðfangasdagskveldi og ekkert endilega lýsandi fyrir stemmninguna sem var mun æstari á köflum.
Fyndnast fannst mér þegar krakkarnir fengu að velja sér einn pakka eftir forréttinn og sonur sæll var svo "heppinn" að velja pakka sem innihélt 7 nærbuxur...verst að við náðum ekki mynd af svipnum á honum. Þetta voru að vísu ofurhetjubrækur og það bjargaði þeim fyrir horn. Á milli rétta hvarf drengurinn og kom svo sigri hrósandi fram íklæddur hverri nærbrókinni yfir aðra og klæddi sig svo úr þeim einni af annari með tilþrifum. Nú vill hann helst ekki klæðast öðrum nærbuxum og ekki færri en tveimur í einu.
Pakkaopnunin stóð svo yfir langt fram á kvöld og við elskhuginn borðuðum konfekt og lásum jólakort fram á nótt.