Jólasteik

Ég var búin að ákveða að vera ekkert að detta í neinn vitleysisgang um jólin hvorki innpökkunarlega né gjafalega séð...nema kannski fyrir mjög svo fáa útvalda. Sauma tvo púða og velja fáeinar myndir í stóran ramma. Ekkert mál og tekur enga stund, svo stutta stund að ég byrja bara á Þorláksmessukveldi og fer að sofa kl. 6 á aðfangadagsmorgun.
Á aðfangadag fannst mér svo alveg ómissandi að brenna greni og gekk æðislega hátíðleg og að mér fannst yfirveguð með logandi grenigrein afturábak um íbúðina til þess eins að stíga ofan á stóra rammann og mölbrjóta glerið. Stóra rammann sem lá á gólfinu innpakkaður í þykkt teppi af því að hann var svo ægilega brothættur. Stóra rammann sem ég var búin að stíga að minnsta kosti þrisvar á án þess að brjóta og án þess að færa. Ég fór að grenja, jólabarnið sem ég ekki er.